5 ஆயிரம் ஆண்டுகளுக்கு முந்தைய நினைவுச் சின்னங்கள் கண்டுபிடிப்பு

   August 29, 2022 • Viduthalai

செங்கல்பட்டு,ஆக.29- செங்கல்பட்டு மாவட்டம், வல்லம் கிராமத்தில், 5 ஆயிரம் ஆண்டுகள் பழைமையான பெருங்கற்கால நினைவுச் சின்னங்கள் கண்டு பிடிக்கப்பட்டுள்ளன. தமிழ்நாடு தொல்லியல் துறை அப்பகுதியில் ஆய்வு செய்ய வேண்டுமென கோரிக்கை எழுந்துள்ளது.

கற்குவைகள் என்பவை பெருங்கற் கால மக்களின் நினைவுச் சின்னங்கள் ஆகும். அன்றைய காலத்து மக்கள் இறந்த வர்களை அடக்கம் செய்த இடத்தை அடையாளம் காண்பதற்காக, பல குறியீடுகளை அமைத்திருந்தனர்.

அந்த வகையில் செங்கல்பட்டு அருகே வல்லம் கிராமத்தில் உள்ள காட்டுப் பகுதியில், ஏராளமான குன்றுகள் உள்ளன. இந்த குன்றுகளில், 5 ஆயிரம் ஆண்டுகளுக்கு முற்பட்ட பெருங்கற்கால  நினைவுச் சின்னங்கள் கண்டுபிடிக்கப்பட்டுள்ளன.

இவை சுமார், 3 ஆயிரம் ஆண்டுகள் தொன்மை வாய்ந்த பெருங்கற்கால அடையாளங்களாக உள்ளன. இவ் வூரில், தொல்லியல் துறை முறையாக அகழாய்வு மேற்கொண்டால், இப்பகுதி யின் தொன்மை மற்றும் ஏராளமான புதிய தகவல்கள் வெளி உலகுக்கு தெரியவரும் என வரலாற்று ஆய்வா ளர்கள் கருத்து தெரிவிக்கின்றனர்.

இதுகுறித்து தமிழர் தொன்மை வரலாற்று ஆய்வு மய்யத்தைச் சேர்ந்த வெற்றித்தமிழன் கூறியதாவது: பெருங் கற்கால நினைவுச் சின்னம் என்பது இன்றும் நம் மக்கள் வழக்காடுகளில் காரியம், கல்லெடுப்பு என்று கூறுவ துண்டு.

இறந்தவர்களைப் புதைத்த இடத் திலோ அல்லது அவரது எலும்புகளைத் புதைத்த இடத்திலோ பெரிய கற்களைக் கொண்டு எடுக்கப்பட்ட  நினைவுச் சின்னங்களை, பெருங்கல் சின்னங்கள் என கூறுகிறார்கள். இவை அமைக்கப் படும் முறையை வைத்து கற்குவை, கற் படை வட்டம், கற்பதுக்கை, கல்திட்டை, குத்துக்கல் என பலவகைகளில் பெயரி டப்படுகின்றன.

இறந்தவர்கள் நினைவாக அல்லது  நினைவுச் சடங்குகளுக்கான கற்களைக் கொண்டு எடுக்கப்பட்ட சின்னங்கள் இவற்றுள் அடங்கும். மேலும், தாழியிலிட்டு புதைக்கும் சின்னங்களையும் பெருங்கல் சின்னங்களாக கருதப்படு கின்றன. இறந்தவர்களுக்காக அமைக் கப்பட்ட இவ்வகையான ஈமச்சின் னங்கள் குறித்து சங்க இலக்கியங்களில் தகவல்கள் உள்ளன.

பெருங்கற்கால நினைவுச் சின்னங்கள் உலகின் பல நாடுகளிலும் காணப்படுகின்றன. மேற்கு அய்ரோப் பிய நாடுகள், பிரிட்டன் நடுநிலை நாடுகள் என இன்னும் பல இடங்களில் இவை காணப்படுகின்றன. அங்கெல் லாம் சின்னங்களை பாதுகாத்து ஆய்வு செய் கின்றனர்.

இப்படியான புராதன சின்னங்கள் தமிழ்நாட்டின் பல பகுதிகளில் பரவ லாகக் காணப்படுகின்றன. அவற்றுள் குறிப்பிடத்தக்க வகையில் காஞ்சிபுரம் மற்றும் செங்கல்பட்டு மாவட்டங்களில் காணப்படும் பெருங்கற்கால சின் னங்கள், மிகவும் தொன்மையானது.

அப்படியான நினைவுச் சின்னங்கள் தமிழ்நாட்டில் மலைக்குன்று பகுதி களில் பரவிக் கிடக்கின்றன. நம் மண் ணுக்கு பெருமை சேர்க்கும் இப்பகுதிகளை பாதுகாக்க ஆய்வுகள் நடத்த வேண்டும். மேலும் இதுகுறித்த தகவல்களை அனைவரும் அறியும் வண்ணம் அறிவிப்பு பலகை வைத்து தெரிவிக்க வேண்டும்.

பெருங்கற்கால மக்கள் பயன்படுத்திய இந்த இடுக்காட்டினை தொல்லியல் துறை முறையாக ஆய்வு செய்யும்போது, இங்கு மேலும் பல ஆச்சரியமூட்டும் தகவல்கள் கிடைக்கக்கூடும். இவ்வாறு அவர் தெரிவித்தார்.

2,500 ஆண்டுகள் பழைமையான முதுமக்கள் தாழி, மண்குவளை கண்டெடுப்பு

  August 03, 2022 • Viduthalai

கமுதி, ஆக. 3-- ராமநாதபுரம் மாவட்டம், கமுதி அருகே 2,500 ஆண்டுகள் பழைமை யான முதுமக்கள் தாழி, மண்குவளை கண்டெடுக் கப்பட்டு உள்ளது.

ராமநாதபுரம் மாவட் டம் கமுதியை அடுத் துள்ள செய்யாமங்கலம் கிராமத்தில் சில மாதங் களுக்கு முன்பு கண்மாய் வரத்து கால்வாய் சீர மைப்பு பணி நடைபெற்றது. 

அப்போது அங்கு ஒரு பகுதியில் 10 முதல் 20 வரையிலான முதுமக்கள் தாழிகள் பூமிக்கு அடியில் இருப்பது தெரிய வந்தது. இந்தநிலையில் இதே கிராமத்தைச் சேர்ந்த ஆசிரியர் முருகானந்தம் என்பவர் சிதைந்து கிடந்த பொதுமக்கள் தாழி மற்றும் அருகில் புதைந்து கிடந்த முது மக்கள் தாழி களை தோண்டி பார்த் துள்ளார். அதில் வித்தி யாசமான நிறத்தில் மண், அதனுள் சிறிய வகை கருப்பு,சிவப்பு நிறத்தில் மண்குவளைகள், எலும் புக்கூடுகள், பட்டையான இரும்பு கம்பிகள் ஆகி யவை இருந்தது தெரிய வந்தது. அதன் அருகே கீழடியில் கிடைத்ததை போன்று 2,500 ஆண்டு கள் பழைமையான 3 அடுக்கு உறைகிணறு புதைந்து இருப்பது கண் டறியப்பட்டது. 

இதுகுறித்து முருகானந்தம் வருவாய்த் துறையினருக்கு தகவல் அளித்துள்ளார். ஆனால் இதுவரை எந்த அதிகாரி யும் பார்வையிட வர வில்லை என புகார் தெரிவித்தார். 

இதுதொடர்பாக தொல்லியல் அலுவலர் களுக்கு தகவல் தெரிவித்து விசாரித்தபோது வைகை ஆற்றின் கிளை ஆறுகளான கிருதுமால் நதி குண்டாறு படுக்கை யில் பண்டைய தமிழர்கள் வாழ்ந்ததாக அடையா ளங்கள் கிடைத்துள்ளன. முதுமக்கள்தாழி, மண் குவளை, உறைகிணறு ஆகிய 2,500 முதல் 3000 ஆண்டுகள் பழைமையா னது என தெரிவித்து உள்ளனர். எனவே செய் யாமங்கலம் மற்றும் அதைச் சுற்றி உள்ள பகுதிகளில் அகழாய்வு செய்தால் தமிழர்களின் வாழ்வியல் சிறப்புகள் தெரியவரும். தமிழ்நாடு அரசு நடவடிக்கை எடுக்க வேண்டும் என்று அந்த பகுதியினர் கோரிக்கை விடுத்துள்ளனர்.

நாட்றாம்பள்ளி அருகே கி.பி.12ஆம் நூற்றாண்டைச் சேர்ந்த கல்வெட்டுகள் கண்டெடுப்பு

  June 12, 2022 • Viduthalai

திருப்பத்தூர், ஜூன் 12 நாட்றாம் பள்ளி அருகே கி.பி.12ஆம் நூற்றாண் டைச் சேர்ந்த கல்வெட்டுகள் கண் டெடுக்கப்பட்டுள்ளன.

திருப்பத்தூர் தூய நெஞ்சக் கல்லூரியின் தமிழ்த்துறைப் பேராசி ரியர் முனைவர். க.மோகன்காந்தி தலைமையில், காணிநிலம் மு.முனிசாமி மற்றும் ஆய்வுக் குழுவினர் திருப்பத்தூர் மாவட்டத்தில் பல் வேறு இடங்களில் கள ஆய்வு நடத்தி பல்வேறு வரலாற்று தடயங்களை ஆவணப்படுத்தி வருகின்றனர். அந்த வகையில், நாட்றாம்பள்ளி அருகே நடத்திய கள ஆய்வில் கி.பி.12ஆம் நூற்றாண்டைச் சேர்ந்த கல்வெட்டு ஒன்றை ஆய்வுக்குழுவினர் கண் டெடுத்துள்ளனர்.

இது குறித்து பேராசிரியர் முனைவர். க.மோகன்காந்தி கூறிய தாவது, ''திருப்பத்தூர் மாவட்டம், நாட்றாம்பள்ளி வட்டம், பங்களா மேடுப் பகுதியைச் சேர்ந்த வரலாற்று ஆர்வலர் கமலநாதன் அளித்த தகவலின் பேரில், எங்கள் ஆய்வுக் குழுவினர் அங்கு சென்று கள ஆய்வு நடத்தினோம். அப்போது, அங்கு 4.5 அடி உயரமும், 3 அடி அகலமும் கொண்ட தேர்ந்தெடுக்கப்பட்ட வெள்ளை நிறப்பலகைக் கல்லில் கல்வெட்டு ஒன்று வாசகத்துடன் இருப்பதை கண்டோம்.

கி.பி.12ஆம் நூற்றாண்டைச் சேர்ந்த இந்த கல்வெட்டில், 7 வரி களில் எழுதப்பட்டுள்ளன. ஆற்றின் வழியாக ஏரிக்கு செல்லும் கால் வாயை சீர்ப்படுத்திய செய்தியை இக்கல்வெட்டு நமக்கு எடுத்துரைக் கிறது. அத்தியூர் என இக்கல்வெட்டில் குறிப்பிடப்பட்டுள்ளது. இன்றைக்கு இதே பெயரில் புதுப்பேட்டைக்கு அருகாமையில் சிற்றூர் ஒன்று உள்ளது. இந்த ஆற்றுக் கால்வாய்க்கு சித்திரமேழி என பொருள். சித்திர மேழி என்றால் அலங்கரிக்கப்பட்ட ஏர்க்கலப்பை என பொருள்.

சித்திரமேழி பெரியநாட்டார் சபை என்ற குழுவினர் அரியலூர் பகுதியை தலைமையிடமாக கொண்டு தமிழ்நாட்டின் பல மாவட்டங்களில் வேளாண்மை பொருட்களை வாங்கி தமிழ்நாடு முழுவதும் வணிகம் செய்துள்ளனர்.

விவசாயத்தைப் பெருக்கும் வித மாக பங்க ளாமேட்டிற்கு அருகே ஓடும் அக்ரகாரத்து ஆற்றுக் கால் வாய் சீரமைக்கப்பட்டிருக் கிறது. இந்தக் கால்வாய் வழியாக செல்லும் தண்ணீர் கரப்ப ஏரிக்கு சென்றதாக இக்கல்வெட் டில் குறிப்பிடப் பட்டுள்ளது. சித்திரமேழி என்ற கல்வெட்டு வாசகத்துக்கு வலு சேர்க்கும் விதமாக அழகிய வடிவில் ஏர்க்கலப்பை ஒன்று சித்திரிக்கப்பட் டுள்ளது.

அதன் அருகிலேயே, குத்துவிளக்கு ஒன்றும் சித்திரிக்கப்பட்டுள்ளது. நாட்றாம்பள்ளி மற்றும் அதனைச் சுற்றியுள்ள பகுதிகளில் இருந்து வரும் நீரோடைகளை சிறு ஆற்றுக் கால்வாயாக மாற்றி அந்த வழித் தடத்தை செம்மைப்படுத்தி, கால் வாய் வழியாக ஓடி வரும் தண்ணீரை ஏரியில் சேமித்து, அந்த தண்ணீரை வேளாண்மைக்கு பயன்படுத்தி யுள்ளனர்.

சோழர் காலத்தை சேர்ந்த இக்கல்வெட்டின் மூலம் பண்டைத் தமிழ் மக்களின் நீர் மேலாண் மைப்பற்றி தெரிந்துகொள்ள சிறந்த சான்றாக இக்கல்வெட்டு அமைந் துள்ளது. கால்வாய் வெட்டித் தருதல் ஒரு அறப்பணியாக பார்க்கப்பட் டுள்ளது என்பது இக்கல்வெட்டு மூலம் நமக்கு உணர்த்தப்படுகிறது.

மேலும், அதேபகுதியில் கி.பி.19 நூற்றாண்டைச் சேர்ந்த மற்றொரு கல்வெட்டும் கண்டெடுத்தோம். அக்கல்வெட்டானது 'பூன குடுத் தான்' என்ற வாசகம் தொடங்குகிறது. பங்களாமேட்டின் வடக்குப்பக்கம் பார்த்தீபன் என்பவரின் நிலத்தின் அருகே இக்கல்வெட்டு நட்டு வைக்கப்பட்டுள்ளது. 

சரியான மழை இல்லாத போது புதுப்பேட்டைச் சுற்றியுள்ள கிராம மக்கள் இக்கல் வெட்டிற்கு ஆடு வெட்டி பலி கொடுத்து பொங்கல் படைத்து வழிபாடு நடத்தி வரு கின்றனர். 

இந்தபகுதி மக்கள் இந்த கல்லை வணங்கினால் மழைப்பொழியும் என நம்பிக்கை கொண்டு இந்த செயலை செய்து வருவது 

தெரிகிறது.

ஆகவே, இது போன்ற வரலாற்று சிறப்பு மிக்க கல்வெட்டுகளை மாவட்ட தொல்லியல் துறையினர் ஆவணப்படுத்தி அதை பாதுகாக்க வேண்டும் என்பதே எங்களது கோரிக்கை'' என்றார்.

தமிழ்நாடு சிவகளை அகழாய்வில் கிடைத்த நெல்லின் வயது சுமார் 3,200 ஆண்டுகள்

   September 11, 2021 • Viduthalai

தூத்துக்குடி மாவட்டம் சிவகளை அகழாய்வில் கிடைத்த நெல்லை கரிம பகுப்பாய்வுக்கு உட்படுத்தியபோது அதன் வயது 3,175 ஆண்டுகள் என்று தெரிய வந்திருப்பதாக தமிழ்நாடு தொல்லியல் துறை தெரிவித்துள்ளது.

தமிழ்நாட்டில் பல்வேறு இடங்களில் நடந்துவரும் தொல்லியல் ஆய்வுகளின் முடிவுகளை தமிழ்நாடு சட்டப்பேரவையில் முதலமைச்சர்  வெளியிட்டிருக்கிறார். இந்த ஆய்வு முடிவுகள் காட்டும் தமிழ்நாடு எப்படி இருந்தது? தமிழ்நாடு அரசின் தொல்லியல் துறை தற்போது கீழடி தொகுப்பு, ஆதிச்சநல்லூர், சிவகளை, கொற்கை, கங்கை கொண்ட சோழபுரம், மயிலாடும்பாறை, கொடுமணல் ஆகிய இடங்களில் தொல்லியல் ஆய்வுகளை நடத்திவருகிறது.

இந்த இடங்களில் நடத்தப்பட்ட ஆய்வு களின் முடிவுகள், அவற்றின் முக்கியத்துவம் ஆகியவை குறித்து தமிழ்நாடு சட்டப் பேரவையில் 110 விதியின் கீழ் தமிழ்நாடு முதலமைச்சர் மு.க. ஸ்டாலின் அறிக்கை ஒன்றை வாசித்தார்.

இதற்குப் பிறகு, இது தொடர்பான காட் சிப் பதிவு ஒன்றும், சிறு வெளியீடு ஒன்றும் வெளியானது. 2015ஆம் ஆண்டிலிருந்து மதுரைக்கு அருகில் உள்ள கீழடியில் நடந்துவரும் தொல்லியல் ஆய்வுகளில் வெளிப்பட்ட மிகப் பெரிய கட்டடத் தொகுதிகள், தமிழ்நாட்டில் தொல்லியல் துறை மீதான ஆர்வத்தை ஏற்படுத்தின. கீழடியில் மூன்று கட்ட ஆய்வுகளை நடத்திய இந்தியத் தொல்லியல் துறை, அதற்குப் பிறகு அங்கு ஆய்வுகளை நடத்த விரும்பவில்லை. இதையடுத்து தமிழ்நாடு மாநில தொல்லியல் துறை அங்கு ஆய்வு களை நடத்த ஆரம்பித்தது. அதன்படி 2017 ஆம் ஆண்டிலிருந்து அங்கு தொடர்ச்சி யாக ஆய்வுகள் நடந்து வருகின்றன.

கீழடியில் கிடைத்த கட்டடத் தொகுதி கள், எழுத்துப் பொறிப்புகள், பொருட்கள் ஆகியவை அங்கு ஒரு நகர நாகரீகம் இருந் ததை உறுதிசெய்தன. பொதுவாக கங்கைச் சமவெளியில் கி.மு. ஆறாம் நூற்றாண்டு வாக்கில் இருந்த நகரமயமாக்கம் (Urban Civilisation)  தமிழ்நாட்டில் இல்லை என்பதுதான் பொதுவான கருதுகோளாக இருந்தது வந்தது. அதேபோல, பிராமி எழுத்து மவுரியர் தோற்றுவித்தது என்றும் அங்கிருந்தே தமிழ்நாட்டிற்கு அந்த எழுத் துகள் வந்தன என்றும் கருதப்பட்டது. ஆனால், கீழடியில் நடந்த ஆய்வுகளின் முடிவுகள், நகரமயமாக்கம் குறித்த கருத்து களை மாற்றின. அந்த காலகட்டத்திலேயே பிராமி எனப்படும் 'தமிழி' பரவலாக எழுதப் பட்டதை, அங்கு கிடைத்த பானை ஓடுகள் உறுதிப்படுத்தின.இங்கு கிடைத்த தமிழி எழுத்துகள் பொறிக்கப்பட்ட பானை ஓடு களை 'ஆக்ஸிலரேட்டர் மாஸ் ஸ்பெக்ரோ மெட்ரி' முறையில் பகுப்பாய்வு செய்த போது, அந்த பானை ஓடுகள், கி.மு. ஆறாம் நூற்றாண்டைச் சேர்ந்தவை என தெரிய வந்திருப்பதாக தொல்லியல் துறை தெரி வித்துள்ளது.

கருப்பும் சிவப்பும் கொண்ட பானை

கீழடியில் தற்போது மேற்கொள்ளப்பட்ட அகழாய்வுகளைப் பொறுத்தவரை, பெரிய அளவிலான செங்கல் கட்டுமானங்களும் தமிழி பொறிக்கப்பட்ட பானை ஓடுகளும், கீறல்கள் எழுதப்பட்ட பானை ஓடுகளும் கிடைத்துள்ளன. இவை தவிர, மணிகள், கற்கள், தாயக்கட்டைகள், கங்கைச் சம வெளிக்கே உரியவை என்று கருதப்பட்ட கறுப்பு நிறப் பானைகள், சீப்புகள் போன் றவை கிடைத்துள்ளன.

இங்கு கிடைத்துள்ள கட்டுமானத்தையும் தொல்பொருட்களையும் வைத்துப் பார்க் கும்போது, கீழடி ஒரு பெரிய நகரமாக இருந் திருக்கக்கூடும் என்றும், இந்தியாவுடனும் இலங்கையுடனும் வர்த்தகத் தொடர்பு களை வைத்திருக்கக்கூடும் என்றும் தெரிய வருவதாக மாநில தொல்லியல் துறையின் செய்திக் குறிப்பு கூறுகிறது.

மேலும் இந்த அகழாய்வில் சந்திரன், சூரியன் மற்றும் வடிவியல் குறியீடுகளுடன் கூடிய வெள்ளிக் காசு ஒன்று கிடைத்தது. இந்தக் காசை, குப்தர் காலத்தைச் சேர்ந்த ஹர்தேக்கர் வரிசை காசுகளுடன் ஆய்வு செய்த நாணயவியல் ஆய்வாளர் சுஷ்மிதா, இதனை மவுரியர் காலத்துக்கு முற்பட்ட காசு எனக் குறிப்பிட்டிருப்பதாக மாநிலத் தொல்லியல் துறை தெரிவித்துள்ளது. ஆகவே, கீழடி பகுதிக்கும் வட இந்தியப் பகுதிகளுக்கும் இடையில் வர்த்தகத் தொடர்பு இருந்திருப்பதை இந்தக் காசு உறுதி செய்திருப்பதாகக் கருதலாம்.

அதேபோல, கீழடியிலும் கொற்கையி லும் கிடைத்த கறுப்பு சிவப்புநிற பானை ஓடுகளை கவனமாக ஆராய்ந்த இந்தியத் தொல்லியல் துறையின் முன்னாள் தலைமை இயக்குநர் ராகேஷ் திவாரியும் பனாரஸ் இந்து பல்கலைக்கழகத்தின் பேராசிரியர் ரவீந்திர என் திவாரியும், கங்கைச் சமவெளிக்கும் இந்தப் பகுதிகளுக் கும் இடையில் வணிகத் தொடர்புகள் இருந் ததை உறுதிசெய்வதாக மாநில தொல்லியல் துறை தெரிவித்துள்ளது.

கீழடியில் கிடைத்த கரிமப் பொருட் களின் மீது ஏற்கெனவே செய்யப்பட்ட கரிமப் பகுப்பாய்வின்படி, அதன் காலம் கி.மு. 585 என தெரியவந்துள்ளதாகவும் தற் போதைய அகழாய்வில் கிடைத்த பொருட் களின் மீது செய்யப்பட்ட மேலும் இரண்டு கரிம ஆய்வுகளும் இந்தக் காலக் கணிப்பை உறுதிப்படுத்துவதாகவும் தொல்லியல் துறை கூறுகிறது.

ஆதிச்சநல்லூர் வாழ்விட ஆய்வு

ஆதிச்சநல்லூரைப் பொறுத்தவரை, அங்கு மேற்கொள்ளப்பட்ட அகழாய்வுகள் இதுவரை பறம்பு (Burial Ground) பகுதி யில் மட்டும் நடைபெற்றுள்ளதால், முதுமக் கள் தாழிகள் பற்றியும், இறந்தவர்களை அடக்கம் செய்யும் முறை, சடங்குகள், பழக்க வழக்கங்கள் பற்றி மட்டுமே அறிய முடிந்தது. அம்மக்களின் வாழ்விடப் பகுதி, வாழ்வியல் நடைமுறைகள் பற்றி ஏதும் தெரியவில்லை. அதற்கு விடைகாணும் நோக்கத்தில் ஆதிச்சநல்லூரின் வாழ்விடப் பகுதியாகக் கருதப்படும் இடங்களில் இந்த முறை மாநில தொல்லியல் துறை அகழாய் வுகளை நடத்தியது.

இங்கு நடந்த அகழாய்வில் இரும்புக் காலம் மற்றும் வரலாற்றுத் தொடக்க காலம் என இரண்டு காலகட்ட வாழ்விடங்கள் கண்டுபிடிக்கப்பட்டுள்ளன. கற்காலத்தைச் சார்ந்த நுண்கற்காலக் கற்கருவிகள் கிடைத் திருப்பதன் மூலம் இரும்புக் காலத்திற்கு முற்பட்ட மக்கள் இங்கு வாழ்ந்திருக்கலாம் என்பது உறுதிசெய்யப்பட்டுள்ளது. இரும் புக் காலத்தைப் பொறுத்தவரை, முதுமக்கள் தாழிகளும் அதனோடு கூடிய ஈமப் பொருட்களும் கிடைத்திருப்பதை வைத்து உறுதிசெய்யப்பட்டிருக்கிறது.

ஆதிச்சநல்லூர் அகழாய்வைப் பொறுத்தவரை, 847 தொல்பொருட்களும் பல்வேறு வகையான பழங்கால மட்பாண் டங்கள் பெரும் எண்ணிக்கையிலும் கிடைத்தன. முதல் முறையாக, தமிழி எழுத் துக்களைக் கொண்ட பானை ஓடுகள் தற் போதைய அகழாய்வுகளில் கிடைத்துள் ளன. மேலும், குறியீடுகள்  (graffiti) கொண்ட பானை ஓடுகள் 500க்கும் மேற்பட்ட எண்ணிக்கையில் கிடைத்துள்ளன.

கருப்பு - சிவப்பு மட்பாண்டங்கள்

மிகத் தரமான தொழில்நுட்பத்துடன் செய்யப்பட்ட மட்பாண்ட வகைகள் வாழ் விடப்பகுதிகளில் கிடைத்துள்ளன. மேலும், வெள்ளை நிற புள்ளிகள் இட்ட கருப்பு - சிவப்பு மட்பாண்டங்கள், கிண்ணங்கள் போன்ற பாத்திரங்கள் வாழ்விடப் பகுதி களில் கிடைத்துள்ளன.

மேலும், செம்பு மற்றும் இரும்பிலான மோதிரங்கள், கண்ணாடி மணிகள், தந்தத் தினால் ஆன மணிகள், அரிய கல் மணிகள், கண்ணாடி வளையல் துண்டுகள், எலும்பு மணிகள், சுடுமண் மணிகள், வளையல்கள் ஆகியவை பொருநை ஆற்றங்கரையில் வாழ்ந்த மக்களின் அணிகலன்கள் குறித்த செய்திகளைத் தருகின்றன.

கருவிகள் செய்யும் கற்கள்

வீடுகளின் களிமண் தரையைத் தேய்க்க உதவும் கற்கள், அரவைக் கற்கள், கருவி களைத் தீட்டும் கற்கள் என வீடுகளில் அன்றாட வாழ்க்கைக்குப் பயன்படும் பொருட்களும் இந்த அகழாய்வில் கிடைத் துள்ளன. சுடுமண்ணால் ஆன மனித மற் றும் பறவைகளின் உருவங்களும் இங்கே கண்டுபிடிக்கப்பட்டன.

மேலும், 21 சுடுமண்ணாலான குழாய்கள் கிடைமட்டத்தில் பொருத்தப்பட்ட நிலை யில் கண்டுபிடிக்கப்பட்டன. இது கழிவு நீரை வெளியேற்றுவதற்கு வீடுகளில் அமைக்கப் பட்டிருக்கலாம் எனத் தெரிகிறது.

சிவகளை அகழாய்வு பாய்ச்சும் வெளிச்சம்

சிவகளை என்ற இடம் தூத்துக்குடி மாவட்டம் ஏரல் வட்டத்தில், தூத்துக்குடியி லிருந்து 31 கி.மீ. தொலைவிலும் சிறீவை குண்டத்திலிருந்து 10 கி.மீ. தொலைவிலும் தாமிரபரணி ஆற்றின் வடக்குக் கரையில் அமைந்துள்ளது.

சிவகளையில் நடந்த முதற்கட்ட அகழ் வாய்வில் 'ஆதன்' என்ற தமிழி எழுத்துப் பொறிக்கப்பட்ட பானையோடு கிடைத்தது. ஆதிச்சநல்லூரைப்போல செம்பினால் ஆன பொருட்களோ அல்லது தங்கத் தினால் ஆன பொருட்களோ சிவகளையில் இதுவரை கிடைக்கவில்லை. ஆனால், கருப்பு-சிவப்பு வண்ணக் கலயங்கள், குடு வைகள், பானை மூடிகள் போன்றவற்றில் அழகிய வடிவமைப்பில் வரையப் பெற் றுள்ள வெள்ளை வண்ண வேலைப்பாடுகள் காணப்படுகின்றன.

இதனை வைத்துப் பார்க்கும்போது இரும்புக் காலத்தில் சிவகளைப் பகுதியில் வாழ்ந்த தமிழ்ச் சமூகத்தின் மேன்மை குறித்து தெரியவருகிறது. மேலும், இந்த அகழாய்வில் கண்டெடுக்கப்பட்ட நெல் லினை கரிமப் பகுப்பாய்வு செய்ததில் இதன் காலம் கி.மு. 1,155 என கால வரையறை செய்யப்பட்டுள்ளதாக மாநில தொல்லியல் துறை கூறுகிறது.

ஆதிச்சநல்லூரில் கிடைத்த உயர் ரகமான வெண்கல, தங்கப் பொருட்களும் சடங்குகளுக்குரிய பொருட்களும் அங்கு ஒரு உயர் ரகமான சமூக, பொருளாதார வாழ்க்கை இருந்திருக்கலாம் என்பதை உணர்த்துவதாக தொல்லியல் துறை கூறுகிறது.

பழந்தமிழர் துறைமுகமா கொற்கை?

தூத்துக்குடி மாவட்டம் ஏரல் பகுதியில் அமைந்திருக்கிறது கொற்கை. பாண்டிய நாட்டின் தலைநகராகவும் துறைமுகப் பட்டினமாகவும் விளங்கிய கொற்கையில் தமிழ்நாடு அரசு தொல்லியல் துறை 1968-1969ஆம் ஆண்டு ஓர் அகழாய்வை மேற்கொண்டது. அந்த அகழாய்வில் சேகரிக்கப்பட்ட கரிமத் துண்டு ஒன்றை பகுப்பாய்விற்கு உட்படுத்தியபோது அதன் காலம் கி.மு. 785 எனத் தெரியவந்தது.

கொற்கையில் கிடைத்த சங்குகள் அங்கு சங்கு அறுக்கும் தொழில் நடந்ததை சுட்டிக்காட்டுகின்றன.

கொற்கையில் மீண்டும் தமிழ்நாடு அரசின் தொல்லியல் துறை மேற்கொண்ட ஆய்வில், சங்கு வளையல்கள் தயாரிக்கும் தொழில் நடைபெற்றதற்கான சான்றுகள் கிடைத்துள்ளதாக கூறப்பட்டுள்ளது. இங்கு கிடைத்த முழுமையான சங்குகள், பாதி அறுத்த நிலையில் உள்ள சங்குகள், முழுவதும் உடைந்த சங்கு வளையல்கள் போன்றவற்றை வைத்து இந்த முடிவுக்கு தொல்லியல் துறை வந்துள்ளது.

வடிகட்டும் குழாய்

மேலும், சதுர வடிவிலான செங்கல் கட்டுமானம் ஒன்றும் இங்கு கிடைத்துள்ளது. இச்செங்கல் கட்டுமானம் 29 அடுக்குகளு டன் 2.35 மீட்டர் உயரத்தைக் கொண்டுள் ளது. இக்கட்டுமானத்தின் நடுவே பெரிய கொள்கலன் ஒன்றும் கிடைத்துள்ளது. தரைத் தளத்தில் சுக்கான் பாறைக் கற்களை அடுக்கி, அதன் மீது மணல் பரப்பி, அதன் மேல் செங்கல் கட்டுமானம் எழுப்பப்பட்டு உள்ளது. இதற்கு அருகிலேயே துளைக ளுடன் கூடிய 9 அடுக்குகளைக் கொண்ட வடிகட்டும் குழாய் ஒன்றும் வெளிப்பட்டு உள்ளது.

இதனருகே மேற்கத்திய நாட்டு பானை ஓடுகளும் கிடைத்துள்ளன. நீண்ட நெடுங் காலமாகத் தமிழ்நாடு பிற நாடுகளுடன் வணிகத்தொடர்பு கொண்டு இருந்தது என்பதையே இந்த பொருட்கள் சுட்டிக் காட்டுவதாக தொல்லியல் துறை கூறுகிறது. மேலும் இந்த அகழாய்வில் கி.மு. 5ஆம் நூற்றாண்டுக்கு முற்பட்ட கங்கைச் சமவெளியைச் சேர்ந்த கருப்பு வண்ணப் பூச்சு பெற்ற (Black Slipped ware of Gangetic valley) பானை ஓடுகள் கண்டெடுக்கப்பட்டுள்ளன.மேலும் இங்கு கிடைத்துள்ள வெள்ளி முத்திரைக் காசுகள், வடக்கத்திய மெருகூட்டப்பட்ட கருப்பு நிறப் பானை ஓடுகள் (Northern Black Polished ware), கங்கைச் சமவெளியைச் சார்ந்த கருப்பு வண்ணப் பூச்சு பெற்றுள்ள பானை ஓடுகள் ஆகியவற்றை வைத்துப் பார்க்கும்போது தென்னிந்தியா கி.மு. 6 ஆம் நூற்றாண்டிற்கு முன்னரே இந்தியா வின் பல்வேறு பகுதிகளுடன் வணிகத் தொடர்பு கொண்டிருந்ததாகக் கருதலாம் என இந்தியத் தொல்லியல் துறையின் முன்னாள் தலைமை இயக்குநர் முனைவர் ராகேஷ் திவாரி, இந்து பனராஸ் பல்கலைக் கழகத்தைச் சேர்ந்த பேராசிரியர் ரவீந்திர நாத் சிங் ஆகியோர் கூறுவதாக தமிழ்நாடு தொல்லியல் துறை கூறுகிறது.

மேலும், இப்பகுதியைச் சுற்றி அதிக அளவிலான தொல்லியல் இடங்கள் காணப் படுவதால், கொற்கை துறைமுகம் கி.மு. 8 ஆம் நூற்றாண்டிற்கு முன்னரே நிறுவப் பட்டிருக்கலாம் என்றும் கருதப்படுகிறது.

மயிலாடும்பாறையில் நடந்த அகழாய்வு

மயிலாடும்பாறையிலும் அருகில் உள்ள வரதனபள்ளி மற்றும் கப்பலவாடியில் கிடைத்த தரவுகளின்படி பார்த்தால், நான் காயிரம் ஆண்டுகளுக்கு முன்பே அங்கு விவசாயம் நடந்திருப்பது தெரிய வந்திருப் பதாக தொல்லியல் துறை கூறுகிறது.

முடிவுகள் வெளியிடப்பட்ட பிறகு, ஊடகங்களிடம் பேசிய தொழில்துறை மற் றும் தொல்லியல் துறை அமைச்சர் தங்கம் தென்னரசு, தமிழ்நாட்டின் தொன்மையை இந்த ஆய்வு முடிவுகள் உறுதிப்படுத்தி யிருப்பதாகத் தெரிவித்தார்.

"மதுரை மாங்குளத்தில் கிடைத்த கல் வெட்டு கி.மு. இரண்டாம் நூற்றாண்டைச் சேர்ந்தது. அதில் பாண்டியன் நெடுஞ்செழி யனின் பெயர் இருந்தது. அதற்கு முன்பு வரை, தமிழனின் வரலாறு இலக்கியம் சார்ந் தது என்பதாக மட்டும் குறிப்பிடப்பட்டது. மாங்குளம் கல்வெட்டுக்குப் பிறகுதான், இது தொல்லியல் ரீதியாக உறுதிப்படுத்தப் பட்டது. புலிமான்கொம்பையில் கிடைத்த கல்வெட்டிற்குப் பிறகு, இது மேலும் உறுதி யானது.

கொற்கையில் கிடைத்த இந்த செங்கல் கட்டுமானம் 29 அடுக்குகளுடன் 2.35 மீட் டர் உயரத்தைக் கொண்டுள்ளது.

இப்போது சிவகளையிலும் கீழடியிலும் கிடைத்த பானை ஓடுகளில் ஆதன் என்ற பெயர் கிடைத்திருக்கிறது.

 தமிழனுக்கு வரிவடிவம் கிடையாது. தமிழி என்று அழைக்கப்படும் தமிழ் பிராமி, அசோகனுக்குப் பிறகுதான் வந்தது என்ற கருதுகோளை முறியடித்து, அதற்கு முன்பே நம்மிடம் நாகரீகம் இருந்தது, எழுத்தறிவு இருந்தது என்பதை இந்த ஆய்வுகள் காட்டுகின்றன" என்று குறிப்பிட்டார்.

இந்த அகழாய்வு முயற்சிகளில் மும் பையிலுள்ள இந்திய புவிகாந்தவியல் நிறு வனம், பெங்களூருவிலுள்ள இந்திய அறி வியல் நிறுவனம், பாரதிதாசன் பல்கலைக் கழகத்தின் தொலையுணர்வுத் துறை, அண்ணா பல்கலைக்கழகத்தின் தொலை யுணர்வு நிறுவனம், சென்னையில் உள்ள இந்திய தொழில்நுட்பக் கழகம் போன்ற ஆய்வு நிறுவனங்களுடன் இணைந்து மாநில தொல்லியல் துறை ஈடுபட்டது.

இந்த அகழாய்வின்போது, தரை ஊடுருவல் தொலையுணர்வு மதிப்பாய்வு (Ground Penetrating Radar), காந்த அளவியல் மதிப்பாய்வு (Magnetometer Survey), ஆளில்லா வான்வழி ஊர்தி மதிப்பாய்வு (Unmanned Aerial Vehicle) போன்ற தொழில்நுட்பங்களைப் பயன் படுத்தி, தொல்லியல் இடங்களை அடை யாளம் காண்பது, அதற்குப் பிறகு அங்கு அகழாய்வுப் பணிகள் மேற்கொள்வது என தொல்லியல் துறை செயல்பட்டது.

சிவகங்கை அருகே 16ஆம் நூற்றாண்டு சிலை கண்டெடுப்பு

  August 22, 2021 • Viduthalai

சிவகங்கை, ஆக.22 சிவகங்கை தொல்நடைக் குழு நிறுவனர் புலவர் கா.காளிராசா, தலைவர் நா.சுந்தர ராஜன் மற்றும் புத்தகக்கடை முருகன் ஆகியோர் முத்துப்பட்டி பகுதியில் உள்ள தனியார் இடத்தில் 16ஆம் நூற்றாண்டைச் சேர்ந்த நவகண்ட சிலையைக் கண்டறிந்துள்ளனர்.

இதுகுறித்துப் புலவர் கா.காளிராசா கூறும்போது, ‘’பழங் காலத்தில் தங்களது அரசர் போரில் வெல்ல வேண்டும் என வேண்டிக் கொண்டு கொற்றவை தெய்வம் முன்பாக வீரர்கள் தங்களை பலி கொடுக்கும் பழக்கம் இருந்தது. இதில் நவகண்டம் என்பது உடலில் 9 இடங்களில் வெட்டிக் கொண்டு உயிரை விடுவர். அவ்வீரர்களை நினைவுபடுத்தும் வகையில் சிலை வடிவமைக்கப்படும்.

மேலும் இப்பழக்கம் 9ஆம் நூற் றாண்டு முதல் 13ஆம் நூற்றாண்டு காலகட்டத்தில் அதிகமாக இருந்தது. அதன்பிறகு படிப்படி யாகக் குறையத் தொடங்கியது. முத்துப்பட்டியில் கண்டறியப்பட்ட நவகண்டம் சிலை 16ஆம் நூற்றாண்டைச் சேர்ந்தது.

இச்சிலை மூன்றடி உயரத்தில், ஒன்றரை அடி அகலத்தில் உள்ளது. தலைமுடிகள் கொண்டையாக கட்டியபடியும், சிதறிய 3 கற்றை களாகவும் உள்ளன. முகத்தில் மீசை காட்டப்பட்டுள்ளது, கழுத்தில் வேலைப்பாடுடன் கூடிய ஆபரண மும், கையில் கழல் போன்ற ஆபரண மும் உள்ளன.

மேலாடை தொங்குவதைப் போல் உள்ளது. இடுப்பில் உறை யுடன் கூடிய குத்துவாள், கால்களில் காலணிகள் உள்ளன. ஒரு கை வில்லுடனும், மற்றொரு கை சிதைந்து உள்ளது. கழுத்தில் வலது புறத்தில் இருந்து இடதுபுறமாகக் கத்தி குத்தியபடி உள்ளது.

மேலும் எங்களது கோரிக்கையை ஏற்று நவகண்ட சிலையை சிவகங்கை அருங்காட்சியகத்தில் ஒப்படைக்க நில உரிமையாளர் ஒப்புக் கொண் டுள்ளார்’’ என்று தெரிவித்தார்.

பெருங்குடி: கி.பி.13-ஆம் நூற்றாண்டைச் சேர்ந்த நிலக்கொடை கல்வெட்டு கண்டுபிடிப்பு

      November 25, 2021 • Viduthalai

மதுரை, நவ. 25- மதுரை விமான  நிலையம் அருகே பெருங்குடி  கண்மாயில் கி.பி.13ஆம் நூற்றாண்டைச்  சேர்ந்த நிலக்கொடை கல்வெட்டு  கண்டறியப் பட்டுள்ளது.

மதுரை பெருங்குடி பெரிய கண்மாய்  அருகே கல்வெட்டு இருப்பதாக  முதுகலை வரலாற்றுத் துறை  மாணவர் சூரியபிர காஷ் தகவல்  அளித்தார். அதன்படி மதுரை சரசு வதி  நாராயணன் கல்லூரி வரலாற்றுத்  துறை உத விப் பேராசிரியர்  து.முனீஸ்வரன் மற்றும்  பேராசி ரியர்கள் லட்சுமணமூர்த்தி,  ஆதிபெருமாள்சாமி ஆகியோர் கள  ஆய்வு செய்தனர். ஆலமரத்து  விநாயகர் கோயில் அருகே  குத்துக்கால் பாதி புதைந்த நிலையில்  கல்வெட்டு இருந்தது. இதனை  ஆய்வு செய்ததில் கி.பி.13ஆம்  நூற் றாண்டை சேர்ந்த கல்வெட்டு  எனக் கண்டறியப்பட்டது.

இதுகுறித்துப் பேராசிரியர்கள்  முனீஸ் வரன், லட்சுமணமூர்த்தி  ஆகியோர் கூறும்போது,  "வேளாண்மை, மண் பாண்டத்  தொழிலில் சிறந்து விளங்கிய  பெருங் குடியில் பெரிய கண்மாய்  ஆலமரத்து விநாயகர் கோயில் எதிரே  கல்தூண் உள்ளது. அவை மண் ணில்  புதைந்த நிலையில் 5 அடி நீளக் கல்  தூணில் எட்டுக்கோணம், 2 பட்டை  வடிவத்திலும் செதுக்கப்பட்டுள்ளது.

மதுரை பெருங்குடி பெரிய  கண்மாயில் உள்ள கி.பி. 13ஆம்  நூற்றாண் டைச் சேர்ந்த நிலக்கொடை  கல்வெட்டு.

தூணின் மேல் பகுதிப் பட்டையில் 3  பக்கம் நில அளவைக் குறியீடுகள்,  மற்றொரு பக்கம்  கோட் டோவியமாக  வரையப் பட்டுள்ளது. நிலத்தை  வைணவக் கோயிலுக்கு  நிலக்கொடையாகக் கொடுத்ததைச்  சுட்டிக் காட்டுகிறது. கல்தூணின்  கீழ்பட்டைப் பகுதியில் 12 வரிகள்  உள்ள எழுத்தமை வின் வடிவத்தை  வைத்து கி.பி.13ஆம் நூற்றாண் டைச்  சேர்ந்தது எனக்  கண்டறியப்பட்டுள்ளது.

பல எழுத்துகள்  தேய் மானமடைந்ததால் முழுப்  பொருள் அறிய முடியவில்லை.  தொல்லிய லாளர்  சொ.சாந்தலிங்கத் தின் உதவியுடன்  கல் வெட்டு படிக்கப்பட்ட தில்,  விக்கிரம பாண்டியன் பேரரையான்  என்ற சிற்றரசன் இப்பகுதியை ஆட்சி  செய்ததாகவும், அப்போது நிலதானம்  வழங்கியவரையும், ஆவ ணமாக  எழுதிக்கொடுத்த குமராஜன்  என்பவரின் பெயரும் கல்வெட்டு  இறுதி வரியில் இருப்பதை அறிய  முடிகிறது’’ என்று தெரிவித்தனர்.

புதுக்கோட்டையில் 10 கோடி ஆண்டுகள் பழைமையான கல்மரம் கண்டெடுப்பு

 

       September 14, 2021 • Viduthalai

புதுக்கோட்டை, செப். 14- புதுக் கோட்டையில் 10 கோடி ஆண்டுகள் பழைமை யான கல்மரம் 12.9.2021 அன்று கண்டெடுக்கப்பட் டுள்ளது.

புதுக்கோட்டை நரி மேட்டின் ஒரு பகுதியில் கூழாங்கல், சுண்ணாம்பு கற்கள் அதிகளவில் காணப்படுகின்றன. இந்தப் பகுதியில் தஞ்சை தமிழ்ப் பல்கலைக்கழகத் தின் தொல்லியல் ஆய்வா ளரான புதுக்கோட்டை யைச் சேர்ந்த எஸ்.பாண் டியன் 12.9.2021 அன்று ஆய்வு செய்தார். அப் போது, 15 செ.மீ. நீளம், 10.5 செ.மீ. அகலத்தில் கல்மரம் ஒன்றை கண் டெடுத்தார். அதை, மேலாய்வுக்காக பொற் பனைக் கோட்டையில் அகழாய்வுப் பணியை மேற்கொண்டு வரும் தமிழ்நாடு திறந்தநிலை பல்கலைக்கழகத்தின் பேராசிரியர் இ.இனியனி டம் ஒப்படைத்தார்.

இதுகுறித்து எஸ். பாண்டியன் கூறியது: இந்த கல்மரமானது, சுமார் 10 கோடி ஆண்டுகளுக்கு முந்தைய கிரெட்டே சியஸ் காலத்தைச் சேர்ந் தது. அதாவது, தற்போ துள்ள பூக்கும் தாவரங் களான ஆஞ்சியோஸ் பெர்முக்கு முந்தைய ஜிம்னோஸ்பெர்ம் வகை யைச் சேர்ந்தது. இது அரிய தொல்லியல் பொரு ளாக கருதப்படுகிறது. இப்பகுதியை தமிழ்நாடு அரசு ஆய்வுக்கு உட்படுத் தினால், மேலும் இது போன்ற அரிய தொல்லி யல் பொருட்கள் கிடைக் கும் என்றார்.

ஏற்கெனவே, கடந்த 2016இல் இதே பகுதியில் தஞ்சாவூர் தமிழ்ப் பல் கலைக்கழக ஆய்வு மாண வர்களால் கண்டெடுக்கப் பட்ட கல்மரம் ஒன்று புதுக்கோட்டை அருங் காட்சியகத்தில் காட்சிப் படுத்தப்பட்டு இருப்பது குறிப்பிடத்தக்கது.